حول اعتقال نجل وزير بالبوليساريو: “وا عنداك طلقوه ثاني”
المحرر العيون
ها روينة نايضة فالانترنيت على اعتقال ولد وزير فالبوليساريو كان غادي بالحشيش للجزائر، العسكر دار خدمتو كما يجب، و هادوك العسكر لي شدوه خاصهم وسام، و حتى لبولسي راهم دايرين خدمتهم و كايحقو معاه و مع العصابة لي تشدات فالصحراء.
الروينة ناضت، و الجرائد كتبات و الاذاعة تطرقت للخبر، و المواطن فرحان، و حتى الشتا قريبة تصب بفضل هاذ الخبر العظيم، لي خلانا نفرحوا و نتشفاو فبوليساريو، واخا غير شي 10 ايام بينما تطفا لقضية، المهم اول مرة واحد انفصالي كايحصل قيطي بالحشيش، و الجريمة ثابتة فحقو.
و لكن واش هاد السيد لي شدوه غادي يتحاكم بحالو بحال لخوت؟ واش ماغاديش ينوضو هادوك لي دايرين رجل هنا و رجل لهيه يغوتو، و يقولو خصوصيات المنطقة و الوطن غفور رحيم؟ واش صحابنا لي فرباط أصحاب المكاتب المكيفة، ماغاديش يدخلو على الخط كيما دخلو فمجموعة من القضايا لي تفكات بسهولة تحت ذريعة خصوصيات المنطقة؟
خفنا تاني لا يطلقوه و يقولو ليك راه الوطن غفور رحيم، ولا راه المغرب كايعطي دروس فالديبلوماسية، و هادوك الخزعبلات لي موالفين شي وحدين كاياكلو بيهم طرف ديال الخبز، و يجيو يضربو كاع هاد الخدمة لي دارو العسكر و الجدارمية و البوليس فالزيرو، وا عنداكم طلقوه …
