حياة القصري الفنانة “بنت الشعب” تهدي أول أعمالها لجمهورها
ثقافة و فنون
المحرر : عرفينا بنفسك..
حياة القصري : حياة القصري عندي 24 سنة كبرت و تربيت فالقصر الكبير و انا حاليا كنعيش بنفس المدينة و بحكم العمل اللي كنوجد ليه انا كنكون بزاف فمدينة الدار البيضاء
المحرر :كيفاش كانت البدايات ديالك مع الفن؟
ح.ق: الصراحة البداية الأولى ديالي مع الفن ملي كنت صغيرة كانت عزيزة عليا الموسيقى و كنبغي الغناء و بديت كنقرا الفن و لكن بعض الظروف ماسمحاتش .. يعني ماسمحتش فالصوت ديالي رغم أنني وجهت لعمل الطرازة و فن القفطان .. و كل ما كتسمح ليا الفرصة كنتلاقا مع فنان و كنخليه يسمعني و كيشجعني و هادشي لي خلاني نرجع للحبي اللول ديال الفن و الغناء ..
المحرر : واش كاين لي داعمك في هاد الطريق؟
ح.ق : الصراحة الدعم المادي ماكاينش .. لا من اشخاص ولا من شركات و لا من الدولة .. اما الدعم المعنوي فالحمد لله كاين فنانة شجعوني و حفزوني كنشكرهم من هاد المنبر.
المحرر:من غير الفن شنو كتبغي تعملي
ح.ق: في أوقات الفراغ ديالي و من غير الموسيقى كنبغي نطرز بحكم أنني كنتمي لمنطقة هاد العمل محبوب فيها و النساء كيبغيوه بزاف و انا كذاك كنحماق على هاد العمل.
المحرر: نرجعو للعمل لي كتوجدي ليه .. ممكن تقربينا منو اكثر ؟
ح.ق : قبل مانبدا التحضير يعني سنة قبل وانا كيتعرض عليا أعمال كثيرة و لكن بحكم احترامي للفن رفضت كل الاعمال لي تقدمات ليا لان الكلمات لي فهاد الأعمال ماكايتوالمش مع المبادئ ديالي و منقدرش نقدمو للجمهور بهاداك المستوى خصوصا وأنه أول عمل فني ليا .. و بقيت كنفكر و كنشوف حتى اقتنعت بعمل في المستوى“ساليت معاك” و لي شجعني هو كاتب الكلمات “ديدي عبدو” و هو غني عن التعريف و هو الصراح ة اللي موريني الطريق . كذلك التوزيع كنتعامل مع زهير حصادي فنان موهوب و غادي فالطريق الفنية رائعة و نتمنى يكون هاد العمل عصري و جديد و كلام يقدر يسمعو الكبير و الصغير و يقدر يتسمع مع العائلة و كلشي.
المحرر : واش مككن نشوفو حياة فمهرجانات ولا فحفلات موسيقية؟
ح.ق: علاش لا؟ هادي أمنية ديالي نغني لولاد بلادي و شرف كبير ليا نغني وسط خوتي .. والحمد لله هذا عمل مشرف و ان شاء الله يهز راس بلادي الفوق و نتمنى بلادي حتا هي دعمني و دعم كاع ولاد البلاد اللي عندهم مايعطيو فجميع المجالات .
