رسالة الى منصف بلخياط: المغرب عمرو كان مفرق حتى شديتي انت وزارة الشباب و الرياضة
المحرر الرباط
سي منصف بلخياط، لي هاجم الحملة ديال المقاطعة، و لي حتى منتمي لحزب التجمع الوطني للاحرار، نسى راسو فاش كان يهضر على الفوارق الاجتماعية و التفرقة و التضامن فالمجتمع المغربي، و ماكانش عارف بلي لمغاربة كاملين عارفين بلي كاين التضامن فالمجتمع المغربي، و على رأسو التضامن لي كايخصصوا فيه لمغاربة 1 في المائة لمؤسسة محمد السادس ديال دعم الرياضيين، لي دوزها لخالو.
سي منصف بلخياط فاش كان وزير ديال الشباب و الرياضة، أحدث المؤسسة ديال محمد السادس لي كاتهتم بالرياضيين، و خصص ليها 1 في المائة من المداخيل الصافية للمغربية للالعاب، و لكم أن تتصوروا 1 في المائة ديال شركة ديال لقمر شحال غادي يكون فيها ديال لفلوس، و لي كادوز للمؤسسة لي دار فيها خالو مقابل أجر كايفوق 4 المليون ديال السنتيم.
واش كاين شي تضامن أكثر من هاد التضامن ا سي منصف، أنك تحيد 1 في المائة من مداخيل المغربية للالعاب، و دوزها لمؤسسة درتي فيها قريب ديالك، و تخلي لمغاربة يتضامنو مع الرياضيين، و مع خالك فنفس الوقت، رغم ان معظم الرياضيين مازال فديور لكرا، و النعمة بانت غا على سي المدير لي دار لاباس.
